Brinca Vai! De aquí a acolá é un espectáculo baseado no libro-cd-dvd Brinca Vai!, editado por Kalandraka Editora, no que se combinan cancións, animacións e interpretacións cos ritmos e rexistros máis divertidos.
O músico e actor Paco Nogueiras vai nos seus espectáculos cos seus instrumentos e a súa querida Máquina nunha divertidísima viaxe chea de humor, baile e cancións. As alegrías, as amizades, os libros, a poesía, a ecoloxía, as festas do ano (o Magosto, o Samaín, o Entroido, o Nadal) e o respecto á nosa lingua son parte do repertorio. Unha fantástica oportunidade de brincar e pasalo ben cos amigos e amigas nun particular camiño onde a música soa con forma de sorriso.
Unha festa participativa e aberta na que che invitamos a vir cantar nunha proposta de vibración conxunta!!!
O máis recente espectáculo infantil da Compañía Nelson Quinteiro, unha colorida e divertida proposta con contos, cantigas, música ao vivo co acordeonista David Álvarez Caneda e escenografía da man do pintor Leandro Lamas. Máis alá das Illas Cíes. Máis alá de Sálvora, de San Vicente, das Sisargas, da Marola ou das Illas Ons existe unha grande pedra no océano que todas e todos coñecen como A Illa do Cón. Os habitantes desta Illa teñen todos dous cousas en común. Adícanse á música e mais ás tarefas do mar.
A actriz palentina Erica González Miguel, coa súa Compañía “O Titiribaile” ofrécenos un particular xeito de narrar contos de todos os tempos dun xeito moi interactivo e orixinal, e que fai as delicias dos cativos.